Servisu Nasional Ambulansia I Emergensia Medika SNAEM,I.P halao atividade enkontru avaliasaun annual ba progressu iha Valu Sere – Lautem, 18-19 Novembru 2022 ho objetivu atu hadiak no hasae liu tan kualidade servisu sira iha Servisu Sentrais no mos Servisu Deskonsentrados sira.
Ba dahuluk Chefe Departamentu Servisu Emergensia Medika Munisipiu Lautem Sr, Amadouro M. Sampaio hanesan uma nain ba iha atividade refere hato’o lia Bem Vindo ba ekipa husi Servisu Sentral no mos ba Chefe Departamentu Servisu Emergensia Medika Munisipiu hotu-hotu, hateten husi Chefe Departamentu SEMM Lautem katak hodi ekipa SEMM Lautem nia naran hakarak hato’o Obrigado wain no agradese boot ba Estrutura SNAEM,I.P tanba bele fo fiar ba ekipa SEMM Lautem hodi organiza no prepara fatin furak Valu Sere Lautem hodi realiza enkontru avaliasaun ida ne’e.
Iha biban hanesan Exmo Sr, Diretor Geral SNAEM,I.P dr. Horacio Saremento da Costa iha ninia diskursu ba abertura atividade avaliasaun ne’e rasik hateten katak aproveita oportunidade ida ne’e iha Valu Sere-Lautem atu ita hotu hare fila fali saida mak ita atinji, hasoru / infrenta durante tinan ida nia laran, liu-liu ba iha dezafius no problema sira hanesan problema kapasidade finanseiru, rekursu humanu, servisu apoiu logistik sira no limitasaun sira hotu, liu-liu limitasaun ba kareta Ambulansia.
Aleim de ida ne’e Exmo Sr, Diretor Geral hato’o mos agradesimento boot ba kargus Diretores no Chefe Departamento sira hotu iha servisu sentrais ba to servisus Deskonsentradus no Funsionariu hotu iha SNAEM,I.P, katak durante tinan ida nia laran ho problema, dezafius no limitasaun sira ne’e hotu maibe la hamate pessoal ida nia vontade atu halao nia knar ho diak, no agradese mos ba parseiru sira hodi nafatin kria linha kordenasaun ne’ebe diak ho parseiru sira atu nune’e parseiru sira ho vontade diak apoiu nafatin SNAEM,I.P ba Futuru.
Rezultadu husi enkontru avaliasaun refere konsege responde duni problema, konfuzaun/duvidas sira kona ba Orsamentu, Planu sira no hadiak liu tan Sistema Servisu Administrasaun nian.
Atividade enkontru avaliasaun ne’e rasik hetan partisipasaun maximu husi Exmo Sr, Diretor Geral SNAEM,I.P dr. Horacio Saremento da Costa, Exmo Sr, Diretor Nasional Administrasaun Planeamentu I Finansas, Sr, José Celestino Guterres Pereira S,teks, Exma Sra, Diretora Nasional Operasoens, dr. Custodia Benevides Florindo, Chefe Unidade Estandaridasaun Kontrolu Kualidade Sr, Fransisco Borges S,kep. no kargus Chefe Departamentu sira hotu husi Servisus Sentrais no mos Servisus Deskonsentradus sira.