MENSAGEM DIRETOR GERAL SNAEM
Bem – Vindo mai Pagina SNAEM, IP.
- Servisu Nacional Ambulancia e Emergencia Medika (SNAEM) hanesan Instituisaun foun ida nebe foin estabelese iha dia 7 de Janeiro 2021. Antes ne’e Ambulancia hanesan Departemento ida nebe tutela ba Diresaun Nasional Apoio Servisu Hospitalar. Tamba ne’e ho estrutura Orgánika Ministériu Saúde nian nee’ebé hatur liu husi Dekretu Lei n.o52/2020, 21 outubru ne´ebé altera Dekretu-Lei n.o 3/2019, 5 marsu, mak reformula kompeténsia sira ba matéria ka servisu ambulánsia no emerjénsia médika husi Diresaun Nasional Servisu Ospitalares no Emerjénsia (DNSHE/agora mak DNASH) ba fali orgaun autónomu ida – nee mak Servisu Nasionál ba Ambulánsia no Emerjénsia Médika (SNAEM, I.P);
- Husi inisiativa ida nee mak atu alarga no hadia diak liutan atuasaun no kualidade prestasaun servisu ambulansia no emerjensia medika ba populasaun hotu iha Timor-Leste.
- SNAEM, I.P. hanesan servisu personalizadu ida, integradu iha administrasaun indireta Estadu nian, ho kapasidade judisiaria ne’ebé asume natureza institutu públiku no iha autonomia administrativa, finanseira no patrimóniu rasik. Nebe nia area juridisaun iha Teritorio Nasional no bele estabelese nia servisu desconcentrados iha munisipiu no iha Rejiaun Administrativa Espesial Ambenu Oekusse nian.
- SNAEM hanesan entidade nebe fornece kuidadus pre hospitalar no garante fornecemento servisu urjénsia no emerjénsia no primeiru sokoru, ba vítima ka ho moras súbita sira
- SNAEM nian misaun mak atu difini, koordena no garante transporte ba urjénsia no emerjénsia no primeiru sokoru, ba sinistradu ka vítima ho moras súbita sira durante 24/7
- Hanesan instituisaun foun nebe foin stabelese hakarak atu sai institusaun nebe inovador, sustentavel no bele sai referencia iha nia aktividades nebe basea ba nia kompetencia kredivel, etika, eficiensia no kualidade.
- Tamba ne’e liu husi pagina ida ne’e hakarak atu esklarese ba publiku kona ba ami nia servisu; saida mak ami halo no servisu saida mak ami fornece. Ita bo’ot sira mos bele akompanha ami nia aktividade sira liu husi pagina Facebook. SNAEM hanesan Instituisaun nebe hakarak fornece servisu emergencia nebe besik liu ba populasaun hotu-hotu.
dr. Simplicio Amaral de Deus
Diretor Jeral SNAEM, I.P